Vətəndaşların növbəti səyyar qəbulu Ərus və Çanaqbulaq kəndlərində keçirilib.
02 iyul 2025-ci il tarixində Yardımlı Rayon İcra Hakimiyyətinin başçısı Ayaz Əsgərov Ərus və Çanaqbulaq kənd sakinləri ilə səyyar qəbul keçirib. Qəbulda RİHB-nın müavinləri, aparatın şöbə müdirləri, idarə, müəssisə və xidmət sahələrinin rəhbərləri iştirak ediblər.
Səyyar qəbullarda ilk öncə Azərbaycan Respublikasının suverenliyi və ərazi bütövlüyü yolunda canını qurban vermiş şəhidlərimizin əziz xatirəsi bir dəqiqəlik sükutla yad edilib.
Rayon İcra Hakimiyyətinin başçısı Ayaz Əsgərov Prezident cənab İlham Əliyev tərəfindən qəbul edilən, əhalinin sosial müdafiəsinə və rifah halının yüksəldilməsinə yönəldilmiş son qərarlardan söz açaraq bütün bunların vətəndaşlara olan dövlət qayğısının göstəricisi olduğunu bildirib, rayonda aparılan tikinti-quruculuq işlərindən və qarşıda duran vəzifələrdən danışıb.
Daha sonra vətəndaşların müraciətləri dinlənilmişdir. Sakinlər kəndə təbii qaz xəttinin çəkilməsi, artezian quyusunun qazılması, kənddaxili yolların təmir olunması, qəzalı vəziyyətdə olan elektrik dirəklərinin yenisi ilə əvəz olunması və digər məsələlər barədə fikirlərini bildirmiş, eyni zamanda şəxsi problemlərinin həllinə köməklik göstərilməsini xahiş etmişlər. Sakinlər tərəfindən qaldırılan suallar yerində operativ cavablandırılıb, araşdırılması tələb olunan bəzi məsələlərlə bağlı aidiyyəti üzrə tapşırıqlar verilib.
